دوو شوێن بۆ یەکەکانی نیشتەجێبوونى کرێنشینان دیاریکرا

لەهەولێر بۆ دروستكردنى یەکەکانى نیشتەجێبوونى کرێنشینان، دوو شوێنى شیاو ده‌ستنیشانكرا کە دەکەوێتە نێوان شەقامى 120م و 150مەتری.

ئەمرۆ سێشەممە 2022.8.30 دوابەدواى فەرمانی مەسرور بارزانی، سەرۆكی حكومەتی هەرێمی كوردستان، لەبارەى دروستکردنی 20 هەزار یەكەی نیشتەجێبوون بۆ كرێنشینان و كەمدەرامەتان لەسەرتاسەرى هەرێمى کوردستان، بەسەرپەرشتی ئومێد خۆشناو، پارێزگاری هەولێر و ئامادەبوونى چەندین بەرپرسی پەیوەندیدار، کۆبوونەوەیەک سەبارەت بەو یەكەی نیشتەجێبووانەی لەهەولێرى پایتەخت دروست دەكرێت بەرێوەچوو.

لەکۆبوونەوەکەدا، پارێزگارى هەولێر، تیشکى خستەسەر پەلەکردن لە جێبەجێکردنی فەرمان و ڕاسپاردەکان سەرۆکى حکومەتى هەرێم و بۆ ئەو مەبەستەش بڕیاریدا بە دەستنیشانکردنى دوو شوێنى شیاو کە دەکەوێتە نێوان شەقامى 120م و 150مەتری بۆ دروستکردنى ئەو یەکە نیشتەجێبووانەى لە هەولێر دروست دەکرێن.

لەتەوەرێکى ترى کۆبوونەوەکەدا، دواى گفتوگۆكردن سەبارەت بە وردەکاری هونەریی و دیزاین و چۆنیەتى دروستکردن و دەستپێکردنى پرۆژەکە، پارێزگارى هەولێر ڕایگەیاند: “جگە لە دیاریکردنی ئەو دوو شوێنە، دەبێت لە ڕێگەی باشترین وەبەرهێنەرانی کوردستان، یەکەکان بە باشترین و چاکترین کوالێتى و شێواز دروستبکرێت”.