هەولێر.. ڕێوڕسمى بڵاوکردنەوەى کتێبى “ئەمەریکا لە چاوی پەنابەرێک” بەڕێوە چوو

ڕۆژى ١ـى ١٠ـى ٢٠٢٢ ، لە سەنتەرى ئاڵا لە شارى هەولێرى پایتەخت ڕێوڕەسمى ناساندن و بڵاوکردنەوەى کتێبى ئەمەریکا لە چاوی پەنابەرێک” وە بەڕێوەچوو. کە لەلایەن نووسەر و ڕۆژنامەوان (گۆران شاخەوان) ئامادەکرابوو.

گۆران شاخەوان، نووسەر و رۆژنامەوان ، لەمیانەى ڕێوڕەسمى بڵاوکردنەوەى کتێبەکەیدا ، ڕایگەیاند:”بەرهەمى “ئەمەریکا لە چاوی پەنابەرێک”وە ، دەبێتە دووەم بەرھەمی چاپکراوم و تێیدا باسی مێژووی ئەمریکا دەکەم”.

وەک نوسەر باسى دەکات ، لە پەرتووکەکەدا “خوێنەر گەشتێک بۆ ئەمریکا دەکات، بە خەیاڵ لە یەک بە یەکی ویلایەت و شارە گەورەکان دەگەڕێت، دەچێتە تایم سکوێر، لەوێ بۆ دوورگەی هوایی، پاشان بازێک بۆ ناشناڵ مۆڵ دەدات. جارجار لەنێو گەرمەی شەڕ و ئاهەنگی سەربەخۆیی و دامەزراندنی دەوڵەت، جارێکی دیکە دەگەڕێتەوە نێو رووداوەکانی کوردستان، ئینجا لەسەرخۆ بەوپەڕی دڵخۆشییەوە دێتەوە سەر باسی زمان و فەرهەنگی کوردەوارى.

نوسەر لە قسەکانی دا بۆ ئەربیل لایف گوتی :”پەرتووکەکەم لە 480 لاپەڕە پێکهاتووە، هەریەک لە د. حەمە مەنتک، د. گۆران سەباح و محەممەد مێرگەیی پێداچوونەوەیان بە دەقەکەدا کردووە، کرمانج عەبدولمەجید دیزاینی بۆ بەرگ و ناوەڕۆکی پەرتووکەکە کردووە و ئەمڕۆش بلاوى دەکەمەوە و داهاتی پەرتووکەکە پێشکەشى سندووقی کۆمەک بۆ شێرپەنجە دەکەم ئەمەش وەک خزمەتێکە بۆ ئەوانەی کە تووشبووی شێرپەنجەیان هەیە، بەڵکو لەو رێگەیەوە بتوانم بەشێک لە ئازارەکانیان کەم بکەمەوە.”

گوتیشى:”جگە لە هەولێر، لە شارەکانى سۆران و چۆمانیش كۆڕ و كۆبوونه‌وه‌م بۆ ناساندنی كتێبه‌كه‌م كردووه و کتێبەکەشم لە ناوەندی ئاوێر لە هەولێر و شار و شارۆچکەکانی دیكه‌ی هەرێمی کوردستان بەردەست دەبێت”.

گۆران شاخەوان ، یەکێکە لە نووسەر و ڕۆژنامەنوسەکانى کوردستان ، جگە لەم بەرهەمە پێشتریش کتێبێکی دیکەى بەناوی “چەپکێک لە زمان و فەرهەنگی باڵەکایەتی” بڵاوکردووەتەوە، کە باس لە رەگەزی نێر و مێ لە شێوەزاری سۆرانی دەکات و لە بەشێک لە زانکۆکانی کوردستان وەک سەرچاوە بەکاردێت.

رۆزە گەردی ـ ئەربیل لایف