وادەی تەواوبوونی پڕۆژەی سندوقی ئاوەڕۆی 60 مەتری ھەولێر ئاشکرا بوو

دروستکردنی پڕۆژەی سندوقی ئاوەڕۆ لە شەقامی 60 مەتری ھەولێر مانگێکی بەسەر تێپەڕی، کەچی تا ئێستا پڕۆژەکە کاری لێ دەکرێت و کارەکەی تەواو نەبووە، بەڕێوەبەری ئاو و ئاوەڕۆی ھەولێریش وادەی تەواوبوونی بۆ ئەربیل لایف ئاشکرا دەکات.

لە لێدوانێکی تایبەتدا بۆ تۆڕی سۆشیال میدیای ئەربیل لایف، زەردەشت عەبدولخالق، بەڕێوەبەری ئاو و ئاوەڕۆی ھەولێر لەبارەی ھۆکاری تەواونەکردنی پڕۆژەکە لە وادەی خۆیدا گووتی: ” سەدا 80ـی پڕۆژەی ئاوەڕۆی سندوقی 60 مەتری ھەولێر تەواو بووە و بەم نزیکانە کۆتایی بە کارەکان دێت”

زەردەشت عەبدولخالق زیاتر گووتی: ” تا 7 یان 8 رۆژیتر کارەکان کۆتاییان پێدێت و شەقامەکە بەڕووی ھاوڵاتییان دەکرێتەوە”

لەبارەی ھۆکاری دواکەوتنی پڕۆژەکە، بەڕێوەبەری ئاو و ئاوەڕۆ ئەوەی خستەڕوو و گووتی: ” دواکەوتن بەھۆکاری تەکنیکی و دواکەوتن لەلایەن ستافی جێبەجێکارەوە بووە، ئەگەر چی کارەکان لەڕووی ھەڵکەندن و سەب و بەیەک بەستنەوەی جۆینەکان تەواوبووە و بۆ ئەو چەند رۆژە تەواوکاری بۆ دەکەین، ئینجا کاری پڕکردنەوەی و قیرکردن دەستپێدەکات”

ئەربیل لایف لەمیانی بەدواداچوون بۆ ھۆکاری دواکەوتن قسەی لەگەڵ بەڵێندەرێکی پڕۆژەکە کرد و ئاماژەی بەوەدا کە بودجەی تەواو بۆ ئەم پڕۆژەیە تەرخان نەکراوە بۆیە سستی لە بەڕێوەچوونی کارەکان ھەیە، بەڵام زەردەشت عەبدولخالق لەبارەی ئەم بابەتە ئەوەی ئاشکرا کرد کە کێشەی بودجە تەواو بووە و چەند کێشەیەکی کارگێڕی ھەبوە و ئەویش چارەسەر کراوە.

ئەمڕۆ 3ـی 9 یەک مانگ بەسەر دەستپێکردنی پڕۆژەکە تێپەڕی، بڕیار وابوو بەپێی بڵاوکراوەی ھاتوچۆی ھەولێر زووتر تەواو بێت بەڵام بەھۆکاری جیاواز دواکەوت، ھاوکات ئەم شەقامەش بە درێژایی ساڵ بەردەوام جانجاڵی بەخۆیەوە دەبینێت و بەتایبەتی لە رۆژانی دەوامی فەرمانبەران، ئەمە لە کاتێکدایە چەند رۆژێکی کەم ماوە بۆ دەستپێکردنی ساڵی نوێی خوێندن و چاوەروان دەکرێت پێش دەستپێکردنی دەوامی قوتابییان و مامۆستایان تەواو بکرێت.

زیرەک میهری ـ ئەربیل لایف