هەولێر، 22ی ئەیلوولی 2025 – لە هەنگاوێکی گرنگدا بۆ پەرەپێدانی سێکتەری تەکنەلۆجیا لە هەرێمی کوردستان، زانکۆی سەلاحەدین بە فەرمانی وەزارەت و زانکۆ، کۆلێژێکی نوێی بە ناوی “کۆلێژی کۆمپیوتەر و ئینفۆرماتیکس” کردەوە.
سامان عەبدوڵڵا، بەڕێوەبەری ڕاگەیاندنی زانکۆی سەلاحەدین، بە “ئەربیل لایف”ی ڕاگەیاند، کە بە پشت بەستن بە فەرمانی وەزارەتی ژمارە (١٦٩٧١) لە ڕێکەوتی ١٤ـی ٩ـی ٢٠٢٥ و فەرمانی زانکۆیی ژمارە (١٤٣٧٧) لە ڕێکەوتی ٢١ـی ٩ـی ٢٠٢٥، بڕیاری کردنەوەی ئەم کۆلێژە دراوە.
کۆلێژە نوێیەکە لە سێ بەشی سەرەکی پێکدێت:
- تەکنەلۆجیای زانیاری (Information Technology)
- زانستی کۆمپیوتەر (Computer Science)
- ژیری دەستکرد (Artificial Intelligence)
بۆ ئەم ساڵی خوێندن (٢٠٢٥-٢٠٢٦)، کۆلێژی کۆمپیوتەر و ئینفۆرماتیکس پلان بۆ وەرگرتنی 170 قوتابی لە هەردوو سیستەمی زانکۆلاین و پارالێل داناوە. دەرچووانی پۆلی 12 دەتوانن لە ڕێگەی فۆرمی زانکۆلاینەوە داواکاری بۆ وەرگیران لەم بەشانە پێشکەش بکەن.
بە کردنەوەی ئەم کۆلێژە، ژمارەی کۆلێژەکانی زانکۆی سەلاحەدین گەیشتە 17 کۆلێژ، کە نیشانەی گەشەسەندن و فراوانبوونی بواری خوێندنی باڵایە لە زانکۆکەدا و وەڵامدەرەوەی پێداویستییەکانی بازاڕی کارە لە بواری تەکنەلۆجیادا.
