ئەربیل لایف – هەولێر
بەپێی نوێترین ئامارەکانی بەڕێوەبەرایەتی گشتی کشتوکاڵی هەولێر و ناوەندەکانی کەشناسی، بڕی بارانبارینی ئەمساڵ لە ناوەندی پارێزگای هەولێر و دەوروبەری، گەشەیەکی پێوانەیی بەراورد بە ساڵی ڕابردوو تۆمارکردووە.
ئامارەکانی پارێزگای هەولێر:
داتاکان ئاماژە بەوە دەکەن کە کۆی گشتی بارانبارین لە ناوەندی شاری هەولێر گەیشتووەتە ٦٠٥.٢ ملم، ئەمە لە کاتێکدایە کە ساڵی ڕابردوو تا هەمان ڕێککەوت تەنیا ١٤١.٣ ملم باران باریبوو. بەرزترین ڕێژەی بارانبارین لەسەر ئاستی پارێزگاکە لە ناوچەی شەقڵاوە بە ١٠٩١.٨ ملم و ناوچەی بالیسان بە ١٠٠٦.٦ ملم تۆمارکراوە. هەروەها بالیسان بە تۆمارکردنی ٩٢.٥ سم بەفر، زۆرترین ڕێژەی بەفربارینی تێدا تۆمارکراوە.
ئاستی بارانبارین لە پارێزگاکان و ئیدارە سەربەخۆکان:
لەسەر ئاستی گشتی هەرێمی کوردستان، ئیدارەی سەربەخۆی ڕاپەڕین (ڕانیە) بە تۆمارکردنی ١١٩٣.٢ ملم لە پلەی یەکەمدایە. ئامارەکانی تری ناوەندی پارێزگاکان بەم شێوەیەن:
هەڵەبجە: ١٠٥٢.٩ ملم
سلێمانی: ١٠٣٨.٤ ملم
دهۆک: ٨٦٠.٧ ملم
ئیدارە سەربەخۆکان:
زاخۆ: ٩٧٣.٩ ملم
سۆران: ٩٥٣.٢ ملم
گەرمیان (کەلار): ٥١٦.٥ ملم
ئەم زیادبوونە بەرچاوەی ڕێژەی باران و بەفر، ئومێدێکی گەورەی لای جووتیاران و پسپۆڕانی ئاو دروست کردووە بۆ تێپەڕاندنی مەترسییەکانی وشکەساڵی و زیادبوونی ئاستی ئاوی ژێرزەوی و بەنداوەکان لە ناوچەکەدا.