ئەربیل لایف – هەولێر
بەڕێوەبەرایەتی هاتووچۆی هەولێر ئاگادارییەکی توند ئاراستەی سەرجەم شوفێرانی ماتۆڕسیکل دەکات و ڕایدەگەیەنێت، کە مەفرەزەکانی پۆلیسی هاتووچۆ شەوانە هەڵمەتێکی فراوان بۆ دەستبەسەرداگرتنی ئەو ماتۆڕسیکلانە ئەنجام دەدەن کە سەرپێچی یاسا دەکەن.
هۆکارەکانی دەستبەسەرداگرتنی ماتۆڕسیکلەکان:
بەپێی ڕاگەیەندراوەکە، هەڵمەتەکە ئەو ماتۆڕسیکلانە دەگرێتەوە کە ئەم سیفەتانەیان هەیە:
بێ تابلۆن و ناسنامەیان دیار نییە.
دەنگیان بەرزە و دەبنە هۆی بێزارکردنی هاووڵاتییان.
لەسەر شەقامەکان مانۆڕ و سەرکێشی (تەقڵە و جوڵەی مەترسیدار) دەکەن، کە ئەمەش ژیانی شوفێرەکە و ڕێبوارانی شەقام دەخاتە مەترسییەوە.
ئاگادارییەک بۆ خێزانەکان:
هاتووچۆی هەولێر داوا لە دایکان و باوکان دەکات، پارەی خۆیان بەفیڕۆ نەدەن لە کڕینی ئەو جۆرە ماتۆڕسیکلانە بۆ منداڵە هەرزەکارەکانیان، چونکە جگە لە مەترسییەکەی، لەلایەن تیمەکانی هاتووچۆوە دەستیان بەسەردا دەگیرێت.
چۆنیەتی هاوکاری هاووڵاتییان:
بەڕێوەبەرایەتییەکە داوا لە هاووڵاتییان دەکات لە هەر شوێن و گەڕەکێکدا حاڵەتی هەراسانکردنیان بەهۆی ماتۆڕسیکلەوە بینی، لە ڕێگەی ناردنی (ناونیشان/لۆکەیشن) بۆ ژمارەی وەتسئەپی بەڕێوەبەرایەتی هاتووچۆ (07506009545) تیمەکان ئاگادار بکەنەوە، تاوەکو دەستبەجێ ڕێکاری یاسایی بەرامبەر سەرپێچیکاران بگرنەبەر.